काठमाडाैँ - मानवसेवा आश्रमले २०८१ सालभित्र पोखरामा महायज्ञ लगायत कुनै पनि औपचारिक कार्यक्रमहरु आयोजना नभएको सम्बन्धित सबैमा जानकारी गराएको छ । सोमबार आश्रमले विज्ञप्ति जारी गर्दै भनेको छ ‘मानवसेवा आश्रमसँग नाम मिल्ने ‘मानवसेवा’ शब्दको अगाडि र पछाडि विभिन्न नामहरु जोडिएको संस्थाले पोखरा महानगरपालिका क्षेत्रमा आयोजना गर्न लागेको कोटीहोम मानवसेवा आश्रमले आयोजना गरिरहेको हो कि ? भन्ने जिज्ञासा धेरै हाम्रा शुभेच्छुक र सहयोगीहरुमा पर्न गएको र यज्ञ आयोजक र महानगरपालिका बीच भएका विभिन्न घटनाहरु 'रुख कटानी, झडप र विवाद'का कारण पोखरा महानगरपालिका र मानवसेवा आश्रमको सम्बन्धमा समेत जनमानसबाट हामीलाई प्रश्न गरिरहनु भएको अवस्थामा हामी सम्पूर्ण जनसमुदाय, अभिभावक, सहयोगी, शुभेच्छुक, उदारमना, परोपकारी मनहरुमा होम, यज्ञको बारेमा मानवसेवा आश्रमले २०८१ सालमा पोखरामहानगर क्षेत्रमा कुनै पनि होम, यज्ञ आयोजना गरेको छैन भन्ने स्पष्ट पार्न चहान्छौँ।’
पछिल्लो समय पोखरामा कोटीहोम विवाद बाहिर आएसँगै मानवसेवा नाम आगाडि र पछाडि जोडिएका संस्थाहरुका कारण धेरै मानिस त्यो संस्था मानवसेवा आश्रम नै हो कि ! भनी झुक्किने र भ्रममा पर्ने गरेको पाइएपछि मानवसेवा आश्रमले सोमबार विज्ञप्ति जारी गरी स्पष्ट पारेको हो ।
मानवसेवा आश्रमका प्रवक्ता सुमन बर्तौलाको हस्ताक्षर रहेको उक्त विज्ञप्तिमा ‘मानवसेवा आश्रम वि.सं. २०६९ सालदेखी खुला आकाशमुनी सडकपेटी एवं सार्वजनिक स्थलहरुमा अति कष्टपूर्ण जीवन विताउन विवश सहयोगापेक्षी सडकआश्रित, अनाथ, असहाय, अशक्त, अभिभावकविहीन, शारिरीक तथा मानसिकरुपमा कमजोर मानवहरुको उद्धार, उपचार, संरक्षण, पालनपोषण एवं पारिवारीक पुनर्मिलनको सेवामा समर्पित रहँदै आइरहेको विशुद्ध परोपकारी सामाजिक संस्था भएकाले अगाडि र पछाडि मानवसेवा नाम जोडिएका संस्थाहरु मानवसेवा आश्रमसँग कुनै सम्वन्ध नरहेको पनि स्पष्ट पारेको छ ।
मानवसेवा आश्रमले देशको विभिन्न जिल्लाहरुको भवननिर्माणसेवामा सबै परोपकारी एवं मानवताप्रेमी मनहरुलाई सहभागि गराउने र मानवता प्रवर्द्धनमा टेवा पुर्याउने अभिष्ट राखि देशका विभिन्न स्थानहरुमा श्रीमद् भागवत सप्ताह ज्ञानविज्ञान महायज्ञ आयोजना गरीरहेको छ। यसै वर्ष मात्रै सुर्खेत, रुपन्देही, कैलालीमा महायज्ञ सम्पन्न भैसकेको र सर्लाही हरिवनमा फागुन २९ गतेसम्म भैरहेको छ भने चैत १७ गते देखि २४ गतेसम्म मकवानपुर हेटौँडामा सञ्चालन हुँदैछ ।
-1733467692.jpg)
