सुर्खेत। प्रधानमन्त्री केपी शर्मा ओलीले अध्ययनबाट प्राप्त ज्ञानलाई व्यवहारिक रूपमा लागू गर्न सके अवसरहरू आफैँ आउने बताउनु भएको छ । मध्यपश्चिम विश्वविद्यालयको तेस्रो दीक्षान्त समारोहलाई सम्बोधन गर्दै उहाँले विद्यार्थीहरूलाई आत्मनिर्भर बन्न प्रेरित गर्नुभयो ।
शुक्रबार सम्पन्न दीक्षान्त समारोहमा तीन व्याजका ३,८४१ विद्यार्थीहरू दीक्षित भएका छन् । दीक्षित विद्यार्थीहरूलाई बधाइ दिँदै प्रधानमन्त्री ओलीले शिक्षा केवल प्रमाणपत्र लिनका लागि नभई व्यवहारमा प्रयोग गर्नका लागि आवश्यक रहेको बताउनुभयो । उहाँले अभिभावकहरूको लगानी, सपना र अपेक्षा पूरा भएको उल्लेख गर्दै विद्यार्थीहरूलाई मेहनत, लगनशीलता र राष्ट्रभक्ति अपनाएर अघि बढ्न आग्रह गर्नुभयो ।
प्रधानमन्त्री ओलीले कर्णालीलाई खस सभ्यताको जननीका रूपमा परिभाषित गर्दै मध्यपश्चिम विश्वविद्यालयको ऐतिहासिक र शैक्षिक महत्त्वबारे चर्चा गर्नुभयो । उहाँले कर्णालीमा जडिबुटी अनुसन्धान, प्राकृतिक स्रोतहरूको अध्ययन र शैक्षिक जनशक्ति उत्पादनमा विश्वविद्यालयले ठूलो भूमिका खेल्नुपर्ने बताउनुभयो । 'राजनीतिक सीमाना महाकाली भएपनि खस सभ्यताको हिसाबले कर्णाली विश्वकै आकर्षणको केन्द्र हो । यहाँका स्रोतसाधनको उचित उपयोग गर्न वैज्ञानिक अनुसन्धान आवश्यक छ,' उहाँले भन्नुभयो ।
विद्यार्थीहरूले आफूले सिकेको ज्ञानलाई व्यवहारमा उतार्न सके अवसरहरू आफैँ प्राप्त हुने भन्दै उहाँले बेरोजगारीको समस्या समाधानका लागि स्वरोजगारलाई प्राथमिकता दिनुपर्ने बताउनुभयो ।'हामी बेरोजगार भयौं भनेरमात्र हुँदैन । आफैँ रोजगारी सिर्जना गर्न लाग्नुपर्छ' उहाँले भन्नुभयो, 'विश्वविद्यालयले तपाईँहरूलाई ज्ञान प्रदान गरिसकेको छ । अब तपाईंहरूले आफ्नो सीपलाई व्यवहारमा उतार्नुपर्छ । सरकार तपाईँहरूको साथमा छ र तपाईँहरूको मेहनतमा समर्थन गर्न तयार छ ।'
प्रधानमन्त्री ओलीले आत्मनिर्भर बन्ने प्रयास गर्नुपर्नेमा जोड दिँदै युवाहरूलाई सिर्जनशीलता, सीप र आत्मविश्वासका साथ अघि बढ्न आह्वान गर्नुभयो ।
-1733467692.jpg)
