रुपन्देही - योग गरौँ निरोगी बनौँ भन्ने वाणीका साथमा मानवसेवा आश्रमले आयोजना गरेको रुपन्देही तिलोत्तमा श्रीमद् भागवत सप्ताह ज्ञान विज्ञान महायज्ञ २०८१ मा शुक्रवार योग कार्यक्रम आयोजना भएको छ । पंतजली योग समिति नेपालबाट वरिष्ठ योग प्रशिक्षक ललितशंकर योगीले योग प्रशिक्षण तथा प्रवचन दिनु भएको थियो । महायज्ञ सुरु भएको पाँचौँ दिन तथा योग शिविरको चौथौँ दिन ललितशंकर योगीले महायज्ञ स्थलमा उपस्थित सबैका लागि योगबाटै शारीरिक र मन दुवै स्वस्थ राख्न सक्ने बताउनु भयो । माघ ७ बाट सुरु भएको महायज्ञ १४ गते समापन हुने श्रीमद् भागवत सप्ताह ज्ञान विज्ञान महायज्ञ २०८१ मूल समारोह समितिले जनाएको छ ।
मानवसेवा आश्रमले लुम्बिनी प्रदेश रुपन्देहीको तिलोत्तमा शाखाको स्तरोन्नति र अक्षयकोष श्रीवृद्धिका लागि र आश्रमलाई तन, मन, धनले सहयोग पुर्याउनु हुने दाताहरूलाई कृतज्ञता ज्ञापन गर्ने उद्देश्यले समेत महायज्ञको आयोजना गरेकाे हाे ।
मानवसेवा आश्रम खुला आकाशमुनि सडक पेटी एवं सार्वजनिक स्थलहरूमा कष्टपूर्ण जीवनयापन गर्न विवश सहयोगापेक्षी, बेसहारा, असहाय, अशक्त, अभिभावकविहीन, शारीरिक तथा मानसिकरुपमा कमजोर मानवहरूको उद्धार, उपचार, पालनपोषण, संरक्षण एवं पारिवारिक पुनर्मिलनको सेवामा समर्पित छ । आश्रम वि.सं. २०६९ साल भाद्र १३ गते मुख्य कार्यालय मकवानपुर, हेटौँडाबाट औपचारिक रूपमा सेवा शुभारम्भ भएको हो ।
आश्रमले वि.सं. २०८२ सालभित्र स्वयं आफ्नो लागि आफै केही गर्न नसक्ने अवस्थामा रहेका, हेरचाह र पालनपोषण गरिदिने समेत कोही नभएका सहयोगापेक्षी (बेसहारा, असहाय, अशक्त, अभिभावकविहीन, मानसिक तथा शारीरिकरुपमा अति कमजोर) सडकआश्रित मानवमुक्त राष्ट्र नेपाल निर्माण गर्ने, घोषणा गरेको छ । घोषणा पश्चातको कार्यान्वयनलाई प्रभावकारी बनाउने संकल्प सहित हाल सात प्रदेशको २० जिल्लामा २६ ओटा सेवा केन्द्रहरूमार्फत ७७ ओटै जिल्ला रविदेशमा बेलायट, कतार, अष्ट्रेलियामा सहयोगापेक्षी सडकआश्रित मानवहरूको उद्धार र तिनीहरूको मानवोचित व्यवस्थापन गर्दै आइरहेको छ ।
-1733467692.jpg)
