तिलोत्तमा । मानवसेवा आश्रमको लुम्बिनी प्रदेश रुपन्देहीको तिलोत्तमा शाखाको स्तरोन्नति र अक्षयकोष श्रीवृद्धिका लागि हुन लागेका श्रीमद् भागवत सप्ताह ज्ञान–विज्ञान महायज्ञको बारे जानकारी दिन शनिबार पत्रकार सम्मेलनको आयोजना गरिएको छ । महायज्ञको विषयमा जानकारी दिन तिलोत्तमा–५ मणिग्राम प्रदर्शनी हुने स्थानमा पत्रकार सम्मेलन आयोजना गरिएको हो ।
आश्रमलाई तन, मन, धनको त्रिवेणीबाट योगदान पुर्याउनुहुने सम्पूर्ण उदारमना दाताको लागि कृतज्ञ ज्ञापन गर्ने उद्देश्यले महायज्ञ आयोजन गर्न लागेको पत्रकार सम्मेलनमा बताइएको थियो । श्रीमद् भागवत सप्ताह ज्ञान विज्ञान महायज्ञबाट ३ करोड रूपैयाँ संकलन गरिने लक्ष्य राखिएकाे महायज्ञ मूल आयोजक समिति संयोजक लोकनाथ भुसालले जानकारी दिनुभयो ।
तिलोत्तमा–५ मणिग्राममा माघ ७ गतेदेखि १४ गतेसम्म सञ्चालन हुने महायज्ञमा भागवत भास्कर कमलनयन गौतमले निःशुल्क कथा वाचन गर्नु हुने कार्यक्रम समेत रहेको छ । महायज्ञले अक्षयकोष श्रीवृद्धि गरी आश्रममा आश्रित सहयोगापेक्षी सडकआश्रित मानवहरूको मानवोचित व्यवस्थापनमा गर्न सघाउ पुग्ने छ ।
साथै माघ ७ गते बिहान ८ बजे तिलोत्तमा शाखाको नवनिर्मित भवनको औपचारिक उद्घाटन लुम्बिनी प्रदेश सरकारका माननीय मुख्यमन्त्री चेतनारायण आचार्यले गर्नुहुने कार्यक्रम रहेको छ भने महायज्ञ बिहान १० बजे शोभा कलश यात्राबाट सुरु भई दिउँसो १२ः३० बजे मुख्यमन्त्री आचार्यद्वारा समुद्घाटन हुने मानवसेवा आश्रमका केन्द्रीय संस्थापक अध्यक्ष रामजी अधिकारी बताउनुभयाे ।
शोभा कलश यात्रामा उपस्थिति जनाउने र र्यालीमा उत्कृष्ट प्रदर्शन हुनेलाई प्रथम, द्वितीय र तृतीयको लागि उचित सम्मानको व्यवस्था गरिएको महायज्ञ मूल आयोजन समितिले जनाएको छ ।
२०६९ भाद्र १३ गते मकवानपुर हेटौँडामा स्थापना भएको मानवसेवा आश्रमको ११ औँ शाखाको रुपमा २०७५ साल पुस ७ गते स्थापना भएको मानवसेवा आश्रम रुपन्देही शाखाको बुटवल उपमहानगरपालिका वडा नं ८ सुख्खानगर र तिलोत्तमा नगरपालिका वडा नं ६ पश्चिम पहुनी मोक्षधाम सेवा आश्रमको परिसरमा निर्माण भएको भवनबाट विगत २ वर्षदेखि आश्रम सञ्चालनमा रहेको छ ।
तिलोत्तमा शाखाले हालसम्म १२५० जनाभन्दा बढी बेसहारा, असहाय, अपाङ्ग, मानसिक तथा शारीरिक रूपमा कमजोर मानिस, अभिभावकविहीन लगायत जीवन नै जोखिममा रहेका सहयोगापेक्षी सडकमानवहरुको लुम्बिनी प्रदेशका विभिन्न जिल्लाहरूबाट समेत उद्धार गरी सेवा प्रदान गरिसकेको छ । भने ३१५ जनाको सुखद् पारिवारिक पुनर्मिलन गरिसकेको छ ।
महायज्ञ सफलता पूर्वक सम्पन्न गर्नका लागि १००१ जानाको मूल समारोह समिति निर्माण भएको छ भने सेवा सहजीकरणको लागि २६ वटा उपसमितिहरु निर्माण गरिएको छ । महायज्ञको संरक्षक परिवार र अभिभावक परिवारमा प्रदेश र जिल्लाका विभिन्न क्षेत्रका प्रमुख एवं प्रतिनिधिहरूलाई मनोनयन गरिएको छ । महायज्ञ सफल बनाउन र सेवा सहजीकरणको लागि मानवसेवा आश्रमको ७ प्रदेशका २० जिल्लामा रहेका २६ सेवाकेन्द्रहरुबाट ३० जनाभन्दा बढी कर्मचारी तथा अभियन्ताहरू सेवामा जुटिरहेका छन् ।
-1733467692.jpg)
