काठमाडौँ । मानवसेवा आश्रमा सबै सेवाकेन्द्रमा आश्रित सहयोगापेक्षी मानवहरुले माघे सङ्क्रान्ति पर्व मनाएका छन् । आश्रमले सेवाकेन्द्रहरूको संरक्षणमा रहनुभएका आश्रितहरूको लागि हरेक पर्व मनाउँदै आएको छ । आश्रमका मानवहरूलाई आफ्नोपनको आभास होस् र घरकै वातावरण सिर्जना होस् भन्ने भावनाका साथ हरेक पर्व आश्रमले मनाउने गर्दै आएको मानवसेवा आश्रम मकवानपुर जिल्ला संयोजक इसा थापाले बताउनु भयो । माघे सङ्क्रान्तिको अवसर पारेर आश्रमका सेवाकेन्द्रहरूमा घिउ, चाकु, तिलका लड्डु, खिचडी, सखरखण्ड, तरुल लगायतका परिकार ग्रहण गरिएको छ ।
हरेक वर्ष माघ १ गतेलाई नेपाली समाजमा माघे सङ्क्रान्ति तथा मकर सङ्क्रान्ति पर्वका रुपमा मनाउने गरिन्छ । माघे सङ्क्रान्ति पर्व आज (सोमबार) देशभर स्नान, जप, तप, ध्यान साधना, दानआदि गरी मनाइएको हो ।
माघे सङ्क्रान्तिका दिन देवघाट, त्रिशूली, कालीगण्डकी, बागमती, इन्द्रावती, त्रिवेणी, रिडीलगायत स्थानमा माघ स्नान गर्न भक्तजनको भीड लागेको छ । ती ठाउँमा विशेष मेलासमेत लागेको छ ।
सूर्य धनु राशिबाट मकर राशिमा प्रवेश गर्ने भएकाले माघ १ गतेलाई मकर सङ्क्रान्ति पनि भनिन्छ भने माघ १ गतेदेखि सूर्य उत्तरायण हुने भएकाले दिनभन्दा रात छोटा हुँदै जान्छन्। धर्मसिन्धुमा माघे सङ्क्रान्तिको दिन घिउ, चाकु, तिलका परिकार, खिचडी नखाने, दान नगर्ने, जलाशयमा गई स्नान नगर्ने, ध्यान नगर्ने व्यक्ति जीवनभर रोगी हुने मान्यता छ।
-1733467692.jpg)
