बागलुङ । बागलुङ न.पा.वडा नं ४ का अध्यक्ष कुमार विक्रम क्षेत्रीको उपस्थितिमा मानवसेवा आश्रम बागलुङ सेवाकेन्द्रकाे भवन निर्माणका लागि उपभोक्ता समिति गठन भएको छ । उपभोक्ता समितिको अध्यक्षमा निर्मल बहादुर श्रेष्ठ, सचिवमा शिव केसी, कोषाध्यक्षमा लक्ष्मी वास्कोटा र ८ जना सदस्य सहित ११ जना रहेको समिति गठन भएको हो । मानवसेवा आश्रम बागलुङको भवन निर्माणका लागि कार्य योजना तयार गरी कार्यान्वयन गर्न गराउन र योजनालाई साकार बनाउन उपभोक्ता समिति गठन गरिएको आश्रमका केन्द्रीय अध्यक्ष अध्यक्ष रामजी अधिकारीले बताउनु भयो ।
मानवसेवा आश्रम खुला आकाशमुनि सडक पेटी एवं सार्वजनिक स्थलहरूमा कष्टपूर्ण जीवनयापन गर्न विवश सहयोगापेक्षी, बेसहारा, असहाय, अशक्त, अभिभावकविहीन, शारीरिक तथा मानसिकरुपमा कमजोर मानवहरूको उद्धार, उपचार, पालनपोषण, संरक्षण एवं पारिवारिक पुनर्मिलनको सेवामा समर्पित छ । आश्रम वि.सं. २०६९ साल भाद्र १३ गते मुख्य कार्यालय मकवानपुर, हेटौँडाबाट औपचारिक रूपमा सेवा शुभारम्भ भएको हो ।
आश्रमले वि.सं. २०८२ सालभित्र स्वयं आफ्नो लागि आफै केही गर्न नसक्ने अवस्थामा रहेका, हेरचाह र पालनपोषण गरिदिने समेत कोही नभएका सहयोगापेक्षी (बेसहारा, असहाय, अशक्त, अभिभावकविहीन, मानसिक तथा शारीरिकरुपमा अति कमजोर) सडकआश्रित मानवमुक्त राष्ट्र नेपाल निर्माण गर्ने, घोषणा गरेको छ । घोषणा पश्चातको कार्यान्वयनलाई प्रभावकारी बनाउने संकल्प सहित हाल सात प्रदेशको १९ जिल्लामा २५ ओटा सेवा केन्द्रहरूमार्फत ७७ ओटै जिल्लाका सहयोगापेक्षी सडकआश्रित मानवहरूको उद्धार र तिनीहरूको मानवोचित व्यवस्थापन गर्दै आइरहेको छ ।
-1733467692.jpg)
