हेटौँडा । १ वर्ष अघि चितवन भरतपुरबाट उद्धार गरी मानव सेवा आश्रम मुख्य कार्यालय हेटौडाको संरक्षणमा आश्रित ५१ वर्षीय सुजन थापाको आईतबार पारिवारिक पुनर्मिलन भएको छ ।
स्वास्थ्य उपचार सँगै मनोपरामर्श सेवा लिइरहनु भएका थापाको स्वास्थ्यमा सकारात्मक परिवर्तनपछि उहाँको परिवारको खोजी आश्रमले गरेको थियो । परिवार खोजीका क्रममा उहाँका भान्जा राजकुमार परियार सम्पर्क आउनुभई आश्रमको मुख्य कार्यालय हेटौडाबाट सुखद पारिवारिक पुनर्मिलन गराउन आश्रम सफल भएको हो ।
मानवसेवा आश्रम खुला आकाशमुनि सडक पेटी एवं सार्वजनिक स्थलहरूमा कष्टपूर्ण जीवनयापन गर्न विवश सहयोगापेक्षी, बेसहारा, असहाय, अशक्त, अभिभावकविहीन, शारीरिक तथा मानसिकरुपमा कमजोर मानवहरूको उद्धार, उपचार, पालनपोषण, संरक्षण एवं पारिवारिक पुनर्मिलनको सेवामा समर्पित छ । आश्रम वि.सं. २०६९ साल भाद्र १३ गते मुख्य कार्यालय मकवानपुर, हेटौँडाबाट औपचारिक रूपमा सेवा शुभारम्भ भएको हो ।
आश्रमले वि.सं. २०८२ सालभित्र स्वयं आफ्नो लागि आफै केही गर्न नसक्ने अवस्थामा रहेका, हेरचाह र पालनपोषण गरिदिने समेत कोही नभएका सहयोगापेक्षी (बेसहारा, असहाय, अशक्त, अभिभावकविहीन, मानसिक तथा शारीरिकरुपमा अति कमजोर) सडकआश्रित मानवमुक्त राष्ट्र नेपाल निर्माण गर्ने, घोषणा गरेको छ । घोषणा पश्चातको कार्यान्वयनलाई प्रभावकारी बनाउने सङ्कल्प सहित हाल सात प्रदेशको १९ जिल्लामा २५ ओटा सेवा केन्द्रहरूमार्फत ७७ ओटै जिल्लाका सहयोगापेक्षी सडकआश्रित मानवहरूको उद्धार र तिनीहरूको मानवोचित व्यवस्थापन गर्दै आइरहेको छ ।
-1733467692.jpg)
