९ कार्त्तिक, बर्दघाट। मेची–महाकाली राष्ट्रिय उद्धार यात्राको बाह्रौँ दिन शुक्रबार १३ जना सडकआश्रित मानवहरुको उद्धार गरिएको छ ।
मेची–महाकाली राष्ट्रिय उद्धार यात्राअन्तर्गत शुक्रबार रुपन्देही बुटवल उपमहानगरपालिका–९ बाट ५ जना, देवदह नगरपालिकाबाट–७ बाट ४ जना र नवलपरासी पश्चिम सुनवल नगरपालिका–३ बाट २ जना, प्रतापपुर गाउँपालिका–२ बाट २ जना गरि १३ जना सडकआश्रित मानवहरुको उद्धार भएको मानवसेवा आश्रमका संस्थापक अध्यक्ष रामजी अधिकारीज्यूले बताउनुभएको छ ।
उद्धार हुनुभएका १२ जना पुरुष र १ जना महिलालाई आजै मानवसेवा आश्रम रुपन्देहीको तिलोत्तमा सेवाकेन्द्रमा गृह प्रवेश गराइएको छ । राष्ट्रिय उद्धार टोली शुक्रबार रुपन्देही र नवलपरासी पश्चिमका विभिन्न स्थानीय पालिकाका सडकपेटीमा अलपत्र अवस्थामा रहनुभएका मानवहरुको उद्धार तथा सेवामा दिनभर खटिएको हो ।
राष्ट्रिय उद्धार टोली शनिबार कपिलवस्तु, तौलिहवा, कृष्णनगर क्षेत्रका विभिन्न सडकपेटी तथा सार्वजनिक स्थलमा बेवारिसे अवस्थामा रहनुभएका मानवहरुको उद्धार तथा सेवामा रहने कार्यक्रम तय भएको छ ।
उद्धार यात्राको १२ औँ दिनसम्मको अवधिमा १२० जना सहयोगापेक्षी मानवहरुको उद्धार गरिएको छ । उद्धार गरिएका २९ महिला र ९१ जना पुरुषको सङ्ख्या मध्ये २ जना बालिका र १ जना बालक पनि रहेका छन् ।
३२ दिनसम्म सञ्चालन हुने उद्धार यात्रामा वरिष्ठ गायिका तथा समाजसेवी आनी छोइङ डोल्माज्यू र मानवसेवा आश्रमका संस्थापक केन्द्रीय अध्यक्ष रामजी अधिकारीज्यूसहित ४७ जना यात्रीहरूको सहभागिता रहेको छ ।
-1733467692.jpg)
