हेटौँडा । मानवसेवा आश्रमले आजदेखि हेटौँडा-९ लामसुरेधापमा महायज्ञ सञ्चालन गरेको छ ।
आइतबारदेखि हेटौँडामा सुरु भएको महायज्ञको बागमती प्रदेशका मुख्यमन्त्री बहादुर सिंह लामाले समुद्घाटन गर्नुभएको हो । साथै मुख्यमन्त्री लामाले बागमती प्रदेश सरकारले आश्रमलाई उचित सहयोग गर्ने बताउनुभयाे भने महायज्ञमा व्यक्तिगत रुपमा मुख्यमन्त्री लामाले अक्षयकोष श्रीवृद्धिका लागि २५ हजार रुपैयाँ दान गर्नुभएको हो ।
मावसेवा आश्रम मुख्य कार्यालयको क्षमता विकास तथा अक्षयकोष श्रीवृद्धि गर्ने उद्देश्यले महायज्ञ आयोजना गरिएकाे हो ।महायज्ञ समुद्घाटन पूर्व कुष्माण्ड सरोवर त्रिवेणी धामबाट बाजागाजा, सांस्कृतिक झाँकीसहित सुरु भएको कलश यात्रा गुम्बा टोल, प्रगति टोल हुँदै आश्रममा पुगेको थियो । साथै महायज्ञमा आइतबार अक्षयकोष श्रीवृद्धिको लागि हेटाैँडा उपमहानगरपालिकाले डेढ करोड सहयोग गर्ने प्रतिबद्धता गरेको छ । त्यस्तै हेटौँडा उपमहानगरपालिका वडा ९ नम्बर कार्यालयले प्रत्येक वर्ष आश्रमलाई आवश्यक पर्ने १० लाख रुपैयाँ बराबरको औषधि उपलब्ध गराउने भएको छ ।
महायज्ञमा कृष्ण धितालले ५ लाख ११ हजार १ सय ११ रूपैयाँ एक काेठा निर्माणका लागि दान गर्नुभएकाे हाे भने पुरन बहादुर जोशीले अक्षयकोष श्रीवृद्धिका लागि ५ लाख रूपैयाँ सहयोग गर्ने प्रतिबद्धता गरेका छन् । सायना खड्काले ५० हजार रूपैयाँ अक्षयकोष श्रीवृद्धिका लागि याेगदान गर्नुभएकाे हाे ।
त्यस्तै उद्घाटन समारोहमा बोल्दै बागमती प्रदेशका पूर्व मुख्यमन्त्री डोरमणी पौडेलले मानवसेवा नै सबैभन्दा ठूलो सेवा रहेको भन्दै मानवसेवा आश्रम हेटौँडाको गौरव भएको बताउनुभयो । जिल्ला समन्वय समिति प्रमुख ललित घलानले पालिकाअनुसार सहयोग गर्न सबैलाई आग्रह समेत गर्नुभयो । साथै घलानले व्यक्तिगत रुपमा आफ्नो एक महिनाको पारिश्रमिक दिने घोषणा गर्नुभएको छ ।
भोलिदेखि २४ गतेसम्म बिहान ५ बजेदेखि ७ बजेसम्म स्वास्थ शिविर, ८ बजेदेखि १० बजेसम्म युवासँग सकारात्मक सोच, मानवता प्रवर्द्धन एवं युवासँग अन्तरक्रिया कार्यक्रम सञ्चालन हुनेछ । महायज्ञमा प्रत्येक दिन बिहान ११ बजेदेखि ४ बजेसम्म भागवत भाष्कर कमलनयन गौतमले कथा प्रवचन गर्नु हुनेछ ।आश्रमको प्राङ्गण हेटौँडा-९ लामसुरेधापमा आजदेखि सुरू भएकाे महायज्ञ चैत २४ गतेसम्म सञ्चालन हुनेछ ।
मानवसेवा आश्रमले मकवानपुरको हेटौँडाबाट सहयोगापेक्षी सडकआश्रित मानवमुक्त राष्ट्र नेपाल निर्माण गर्ने अभिष्ट राखी वि.स. २०६९ साल भाद्र १३ देखि सेवा शुभारम्भ गरेको हाे ।
-1733467692.jpg)
