हेटाैँडा । शनिबार हेटाैँडाकाे ओम्यास सिनेमा हलमा साङ्लोमा बाँधिएका मानवहरूको जीवनमा आधारित वृत्तचित्र 'साङ्लो' प्रस्तुत गरिएको छ ।
मानवसेवा आश्रमले यसै वर्ष मेची-महाकाली उद्धार यात्राका क्रममा उद्धार गरिएका मानिसहरूकाे जीवनमा आधारित साङ्लाे वृत्तचित्र निर्माण गरेकाे थियाे । हलमा वृत्तचित्र हेर्न आएका धेरैजसो दर्शकहरूका आँखा पनि रसाएका थिए । कार्यक्रममा सम्पूर्ण व्यक्तिलाई आश्रमको आवश्यकता र महत्वबारे बुझाउन आश्रमले तयार पारेको वृत्तचित्र देखाइएको हो ।
शनिबार सहयोगापेक्षी सडकआश्रित मानवमुक्त देश नेपाल निर्माण र मानवता प्रवर्द्धनको लक्ष्य राखी तयार पारेको 'मरेर पनि बाँचिरहेका र बाँचेर पनि मरिरहेकाहरूको जीवन समेटिएकाे 'साङ्लो' शीर्षकको वृत्तचित्र देखाइएकाे हाे ।
कार्यक्रममा हेटाैँडा उपमहानगरपालिका भित्र रहेका टोल विकास समिति, टोलका सरसफाइ समिति, शैक्षिक संस्था, व्यक्तित्व, स्वयंसेवक, व्यापारी, बुद्धिजीवी, आमा समूह, धार्मिक तथा आध्यात्मिक क्षेत्रमा रहेका व्यक्ति तथा स्थानीय तहका कर्मचारी जनप्रतिनिधिहरूकाे समेत उपस्थिति रहेको थियो । कार्यक्रम मानवसेवा आश्रमका संस्थापक तथा केन्द्रीय अध्यक्ष रामजी अधिकारीले सञ्चालन गर्नुभएकाे थियाे ।
साथै कार्यक्रममा मानवसेवा आश्रमले आयाेजना गर्न लागेकाे महायज्ञकाे बारेमा समेत जानकारी गराइएकाे थियाे ।आश्रमले मुख्य कार्यालय हेटाैँडाकाे क्षमता विकास एवं अक्षयकोष श्रीवृद्धिका लागि महायज्ञ आयाेजना गर्न लागेकाे हाे । महायज्ञ मानवसेवा आश्रम मुख्य कार्यालयकाे प्राङ्गणमा चैत्र १७ गतेदेखि २४ गतेसम्म सञ्चालन हुने आश्रमले जनाएकाे छ ।
मानवसेवा आश्रम विगत १२ वर्षदेखि खुला आकाशमुनि सडकपेटी एवं सार्वजनिक स्थलहरूमा कष्टपूर्ण जीवनयापन गर्न विवश सहयोगापेक्षी, बेसहारा, असहाय, अशक्त, अभिभावकविहीन, शारीरिक तथा मानसिकरुपमा कमजोर मानवहरूको उद्धार, उपचार, पालनपोषण, संरक्षण एवं पारिवारिक पुनर्मिलनको सेवामा समर्पित हुँदै आरहेकाे छ । आश्रमले वि.सं. २०६९ साल भाद्र १३ गते मुख्य कार्यालय मकवानपुर, हेटौँडाबाट औपचारिक रूपमा सेवा शुभारम्भ गरेकाे हो ।
-1733467692.jpg)
