नेपालगञ्ज । मानवसेवा आश्रम लुम्बिनी प्रदेश, बाँके शाखाको भवनको शिलान्यास गरिएको छ।
साेमबार लुम्बिनी प्रदेश सरकार आन्तरिक मामिला तथा कानुन मन्त्री आदेश कमार अग्रवालले सहयोगापेक्षी सडकआश्रित मानवहरुको लागि बाँके शाखाको भवनको विधिवत रूपमा शिलान्यास गर्नुभएकाे हाे । सहयोगापेक्षी मानवहरूकाे संरक्षणका लागि डुडुवा-६ असमानपुरमा ५ करोडको लागतमा अत्याधुनिक दुई तले भवन निर्माण गरिने भएकाे छ ।
जयन्दु बाल सुधार गृहका लागि चार विघा १२ कठ्ठा जग्गा दान दिइसक्नु भएका दानवीर जइकेस सिंहले मानवसेवा आश्रमका लागि दुईवर्ष अघि १० कठ्ठा जग्गा दान गर्नु भएपछि सो क्षेत्रफलमा आश्रम बन्न लागेको हो ।
मन्त्री अग्रवालले मानवीय सहयोगार्थ निर्मित आश्रय भवनका लागि प्रदेश सरकार सहयोग गर्न प्रतिवद्ध रहेको विश्वास दिलाउनु भयो । मन्त्री अग्रवालले मानवसेवा आश्रमको सेवा कार्य उत्कृष्ट रहेको भन्दै भवन निर्माण कार्य अघि बढाइए सहयोगी हातहरु पनि जुटदै जाने विश्वास व्यक्त गर्नुभयो ।
समारोहमा जग्गा दाता जइकेस सिंहले दान दिएर आफूले खुसी र पुन्य कमाएको महसुस भइरहेको भन्दै सबैमा सहयोगको अपील गर्नु भयो । आश्रमअभिभावक परिवारकी सह संयोजक एवं नेपालगञ्ज उपमहानगरपालिका निवर्तमान उपप्रमुख उमा थापामगर, मानवसेवा आश्रम भैतिक विकास प्रर्वद्धन समितिका संयोजक विष्णु मैनाली, प्रर्वद्धन परिवारका सदस्य कृष्ण प्रसाद श्रेष्ठ, डुडुवा वडा नम्बर ६ का वडा अध्यक्ष मोहनराम मिश्र, फत्तेबाल आँखा अष्पतालका प्रवन्ध निर्देशक डा कौशल कुमार बर्मा, दाता समाजसेवी सुशिला शर्मा लगायतले शुभकामना मन्तव्य व्यक्त गर्नुभएको थियो ।
नयाँ बन्ने अत्याधुनिक भवन १ सय जना सहयोगापेक्षी सडकआश्रित मानवहरुको संरक्षण गर्ने क्षमताकाे रहेकाे छ ।
-1733467692.jpg)
